ГӏалгӀайчен Хьалхарчарна беза шоай къаман мотт
Халкъашта юкъера наьна метта ди хиларца дувзаденна, Хьалхарчарцара хьинар дараш - Наьсарен №15 йолча юкъерча ишкола дешархой, шоай хьехамчаца Кхоартой Фатимайца хьоашалгӀа баха хилар цӀихеза гӀалгӀай йоазонхо Коазой Ӏийса волча, иштта «СелаӀад» журнала редакце.
Аюпа Ӏийсай кхоллама лакха мах оттабу вай къамо. Укх дукхача шерашка культуран, юкъарлон оагӀон тӀа къахьегаш из дика тӀаэцаш а вовзаш а ва вай мехкахошта. Деша говзанча волча Ӏийсайца кхетаче хилар вай ондаргий. Йоазонхочо дийцар ший вахара наькъах, иштта берашта хьалхадаьккхар гӀалгӀай мотт бувцаш хила дезилга.
ШоллагӀча даькъе бераш дахар «СелаӀад» журнала редакце, цига уж гӀадбахарца тӀаийцар кепайоазонца къахьегараша. Вай эггара зӀамагӀа болчарна кхетам луш йола экскурси дӀайихьар, из дӀахьош царна гуш дар йоазош гулдеш, царна кепа тохаш дола балха дакъа. Берий иштта кхетаче хилар Ӏарчакханаькъан Сайт-Саламца. Цун кхоллама йоазошта дукха кепа йийттай, газета оагӀонаш тӀа санна, дешара книжкаш тӀа а.
«Хьалхарчар болама», «Россе аьрзелгаша» шоай мотт безаш хилар, журнала болхлошцара безам боккха хилар гойтар хозача байташца.
Царна совгӀата делар т1еххьара арадаьнна «СелаӀад», мерза даараш.
