Укх деношка, Илдарха-ГӀалан № 1 йолча юкъерча ишкола дешархой бахар 1941-1945 шерашка, Сийлахь-боккхача Даьймехка тӀема ветераний фусам-ноаной болча, яхаш, дийцар «Сердало» газетага «Хьалхарчар Болам» яхача моттигерча отделене зарбан болх лелабераша.

«Дика цӀай, маьтсела бетта 9-гӀа ди хетаду мехка кортамукъале йоаккхаш, тыле къахьегаш хиннарашта. Берашта цу дийнахьа яйзар Султиганаькъан ШафиӀат, Мархенаькъан Райхьант.

БоккхагӀбараш лоархӀаш хилара белгало гойташ; дешархоша, бӀухой фусам-ноаношта зизаш, совгӀаташ делар. Шоай аргӀагӀа, ветераний фусам-ноаноша берашта Сийлахь-боккхача Даьймехка тӀема халонех дийцар, иштта вахарерча нийсача наькъ тӀа уж боахаш дола хьехар а дир», - аьлар кепайоазоно.

«Денгара ди массаза дала, вай гаьнадоалаш латт 1945 шера хиннача тӀема, бакъда цо таро луц вайна вай хьамсарча мехкахошта карагӀдаьннар дицде. Тахан хьалхарча мугӀарашка латт доккхагӀа дола ноахал, цо ший деналца гойт вайна къахьегама, денала, Даьхенцарча безама масалаш», - аьлар «Хьалхарчар Болама» викала Налганаькъан Рамзана.