«Олганаькъан Марианна начӀал дола илли алархо я, цо яьккхай Гнесинар цӀерагӀча ашарий Российски академе эстрадан ашарий искусствон факультет. Эстрадно-джазови иллиалархочун классах дола дешар дийшачул тӀехьагӀа, из хилар ГӀалгӀайчен театра, кинон, креативни индустре керттерча моттига артистка. Цо массехк дика болх дӀаязбаьб, из цун кхоллам безаш болча наха дика тӀа а ийцаб», - аьлар «Сердало» газетага иллиалархочун балха новкъосташа.

Цу тайпарча моттига юкъе дакъа лоацаш Марианна хьалхара я, бакъда цун новкъостий тешаш ба ГӀалгӀайче цо диканца гойтаргхиларах. Из чӀоагӀа сатувсаш я, ше мехкахоша хьаллоацаргхиларах, цар таро я, яхь дӀахьоча хана, цунна тӀехьа кхадж тасса. ХӀара хьажархочох тийша да яхье дакъа лоацачар котало яккхар.

«Керда седкъа» яха яхь безаме а хьажа дог доагӀаш а хургья, цун хӀара доакъашхо ший гӀулакха говзанча ва, котало яккхара еррига таронаш йолаш а ва.