Ставрополе дӀайихьача мехкашта юкъерча кхетаче дакъа лаьцар вай йоазонхоша
«Литературан барта тӀаьш» яха кхетаче дӀайихьар Ставрополерча Лермонтов М. Ю. цӀерах йолча библиотеке. Цига дакъа лаца ваха хилар вай мехкарча йоазонхой Союза керте латта Ноакастхой Хаваж.
«ГӀалгӀай литература таханарча дийнахьа малагӀча хьале да, малагӀча проекташка дакъа лоацаш хиннаб къаман йоазонхой тӀехьарча хана, дӀахойодача хана йоазонхой Союза кхоачашде лерхӀарех, иштта кхыдолча вай къаман йоазонхошца дувзаденнача гӀулакхех дийцар Ноакастхой Хаважа», - яхаш, хоам бу «Сердало» газетага къаман библиотекан зарбан болх лелабераша.
Къилбаседа Кавказа эггара къаьнагӀа йолча библиотекан йоккхача зале хозаш яр Кавказерча къамий метташца язъяь байташ, иштта берашта лаьрхӀа дола дувцараш. Кхетачен доакъашхошта лаьрхӀа тайп-тайпара балхаш хьокхаш, гойтам бар цига. Массане самукъадоалаш, моттиг хилар цох.
