Бахархоша, хьаьшаша салоIаш йола моттиг хургья Магасера Алане доазув
2025-ча шера мехкара бахархой, хьатIауха хьаьший салаIа гуллуш йола моттиг хургья Алане доазув. Из хоам «Сердалога» бир Мехкадаь зарбан болх лелабераша.
«Укхаза хьалъеш латтача йоккхача хIама йохкача-салоIача моттиге болх беш хургба вайцигара, федеральни даькъ тIара хIама хьадераш. Боккхийбарашта, берашта салоIаш ха дIаяхьа мел эшараш долаш хургья из моттиг. Гуцаранаькъан Микаила вай республике дIахьоча балхашта юкъе эггара боккхагIа бола болх ба из. Миллиард совгIа ахча да бизнесмена цу гIулакха дIадохийташ латтар», - белгалдир вай Мехкадас Келаматанаькъан Махьмуд-Iаьлас цу йоккхача, лоархIамеча проектах дувцаш.
Мехка кулгалхочо белгалдир; из ТРЦ Къилбаседа Кавказе доккха дакъа дIалоацаш хургья, аьнна. Ма хетта салаIа безам бола бахархой, хьаьший тIалатташ моттиг хургья из, хьалъяь яьлча.
