ГӀаьбартой-Балкхарой мехкарча яхье, белгалбаьлар вай наьк дераш
08.04.2025 09:23
ГӀабартой-Балкхарой мехка дӀайихьача мехкашта юкъерча яхье, лакха говзал гойтар вай мехкарча наьк дераша. 14 дошо, 7 дото, 6 борза майдилгаш яьхар вай спортсменаша. Из хоам «Сердалога» бир спорта гӀулакхех йолча министерствос.
«Кашхатау яхача юрта дӀайихьар балкхарой къам меттаоттадаьча Денна хетаяь яхь. Цу мехкара санна, лоалахарча доазонашкара спортсменаш гулбеннабар цига дакъа лаца. Лакха говзал, шоай гӀулакх дика довзаш, шаьрдаь хилар гойтар наьк дарах йолча Федерацена хьалха латтача Малсаганаькъан Ӏамархана кхебаьча вай мехкарча спортсменаша. Республикера 13 наькахо вар цига дакъа лоацаш хиннараш», - дийцар тха газетага.
