Хьалхара моттиг яьккхар вай наьк дераша
Нальчике дIайихьача мехкашта юкъерча яхье хьалхара моттиг яьккхар вай мехкарча наьк дераша. Из хоам «Сердалога» бир Минспорта зарбан болх лелабеча ГIаппархой Аишас.
Къаман цхьанкхетара Денна хетаяь яр Нальчикера яхьаш. Къилбаседа Кавказа моттигашкарча 13 клуба 183 наькахо вар цига гулвеннараш. Вай мехкара цига дакъа лоацаш 9 саг хилар.
14-15 шераш даьннарашта юкъе 50 м латтача оагIонца котало Угурчанаькъан Мухьмада яьккхар, иштта белгалваьлар цу оагIонца Мартазанаькъан Мухьаммад а. 16-18 шерашка кхаьчарашта юкъе котало Лаьнанаькъан Имранага кхаьчар ( 50 м).
Дошо майдилг йоаккхаш, белгалваьлар Лаьнанаькъан Берс (50 м), иштта дото майдилг яьккхар цо кхыча оагIонца а.
11-13 шераш даьннарашта юкъе лакха говзал гойташ наьк дир Шаденаькъан Мухьаммада.
14-15 шераш даьннарашта юкъе кхоалагIа моттиг яьккхар Йовлой СаIида.
Букъ тIа уллаш наьк деш дото майдилг яьккхар Мержой Дениса (9-10 шу, 50 м). Цу лоархIамеча яхьашка вай мохк лакхача боараме дIахьокха аьттув баьлар кагирхой.
Царца яхьашка дакъа лоацаш хилар республикерча наьк дарах йолча Федераце президент Малсаганаькъан Iамархан.
