Кисловодскерча яхьашка белгалбаьлар вай мехкара наькахой
Боккхача тӀема юкъе Гитлер яха моастагӀа эшавеш яьккхача Коталон 80 шу дизара хетаяьча яхьашка, дикка белгалбаьлар вай мехкара наьк дераш. Из хоам «Сердалога» бир Минспорте.
«12 дошо, 7 дото, 3 борза – 22 майдилг яьккхар вай мехкахоша. Малсаганаькъан Ӏамархана кхебаьча бархӀ спортсмена дӀагойтар, наьк дар шоашта мел гарга да.
«Б» оагӀонцарча 14-15 шераш даьннарашта юкъе, 100 метрага кхоачаш наьк даь, котало яьккхар Угурчанаькъан Мухьмада. Мартазанаькъан Мухьаммада хьалхара моттиг яьккхар 50 метрах болча оагӀонца, 100 метрах - шоллагӀа моттиг, иштта борза майдилг яьккхар низах визза хиннача спортсмена 50 метрах хиннача лоӀамерча оагӀонца.
16-18 шераш даьннарашта юкъе 100 метрах болча оагӀонца хьалхаваьлар Лаьнанаькъан Имран, иштта лоӀамерча оагӀонца белгалваларах дотув делар цунна»,-дийцар тха газетага
. Дикача оагӀорахьа шоаш дӀахьекхар «А» тоабан доакъашхоша а. Шаденаькъан Мухьаммад (11-13 шу) 50 метр брассом, 50 метр лоӀамерча оагӀонца, 50 метр букъ тӀа уллаш наьк дарах белгалваьлар, иштта 100 метрах болча оагӀонца шоллагӀа моттиг яьккхар цо.
Кхаь оагӀонца наьк деш хьекхача говзалах толашагӀа барех ва аьнна хьакхайкавир Лаьнанаькъан Берс (14-15 шу). Йовлой СаӀида (14-15 шу) лоӀамерча оагӀонца 100 метрах наьк даь дошо майдилг йоаккхаш дӀаяхар уж яхьаш, баттерфлей, брасс яхача оагӀонашца дотув даьккхар цо, иштта лоӀамерча оагӀонца 50 метрах нек даь борза майдилг кхаьчар цун. Малсаганаькъан Азраила ( 14-15 шу) 50 метрах брассом, букъ кӀалха болаш наьк деш шоллагӀа, кхоалагӀа моттигаш яьхар.
