ГӏалгӀайчен наькахоша дика толамаш даьхар Кисловодскерча яхьашка
ГӏалгӀайчен наьк дарах йолча гулъяьча тоабо дика толамаш даьхар йийллача яхьашка, из кхетаче хетаяь яр Кисловодскера «ЮРС» клуб хьакхеллача денна, яхаш, дийцар «Сердало» газетага ГӏалгӀай Республикан зарбан болх лелабераша.
«ГӏалгӀай Республикан, Краснодарски края, Ставропольски края, Селий Республикан, РСО-Алане, ГӀабартой-Балкхарой Республикан 18 клубера 370 гаргга спортсмен вар цига дакъа лоацаш.
Вай мехкара цу яхьашка дакъа лоацаш вар бархӀ саг. Наьк деш гаьна вахарах (16-18 шу) хьалхара хилар Лаьнанаькъан ӏимран, 50 метр наькх тӏа наьк дарах, иштта 100 метр лоӀама кеп. Мартазанаькъан Мухьмада (14-15 шу) хьалхара моттиг яьккхар - 50 метр наькх тӀа уллаш, шаккха кулг хьаракхувсаш наьк дарах, 2-гӀа моттиг – 50 метр лоӀамеча кепах, иштта 3-гӀа моттиг – 100 метр лоӀамеча кепах.
Шаденаькъан Мухьмада (11-13 шу) дото совгӀат даьккхар 50 метр лоӀамеча хьисапе, иштта борза совгӀат - 100 метр лоӀамеча кепах. Угурчанаькъан Мухьмада (14-15 шу) кхоалагӀа моттиг яьккхар, 50 метр лоӀамеча кепе наьк деш. Мержой Денена (9-10 шу) борза совгӀат делар, 200 метр лоӀамеча кепе наьк дарах», - аьлар берий хьехамча волча, ГӏалгӀай Республикан наьк дара Федераце президента Малсаганаькъан Ӏамархана.
Цул совгӀа, гӀалгӀай тоабо 2-гӀа моттиг яьккхар 4х50 йолча лоӀамеча кепах. Тоабанна чубоагӀаш бар Лаьнанаькъан Берс, Угурчанаькъан Мухьмад, Лаьнанаькъан ӏимран, Мартазанаькъан Мухьмад.
