Наьканчаша дика толам гойтар, халкъашта юкъерча яхьашка
ГӀалгӀайчен наьканчаша дика физически кийчо гойтар, нек де ховш хилар гойта дезача яхьашка. Из бахьан долаш йийллача, Черкеске дӀахьош хиннача халкъашта юкъерча яхье тайп-тайпара дика совгӀаташ даьхар цар, яхаш, дийцар «Сердало» газетага ГӀалгӀайчен спорта Министерстве.
«ГӀалгӀайче наьк деча спорта оагӀув дӀайолаенна дукха ха еце а, мехка гулъяьча тоабо йоккхача яхьашка дика толамаш гойтар. Яхьаш дӀахьош яр инарал-майора Боташев Канамата дагалоаттама. Цига Лаьнанаькъан Имран брассом оалача тайпара 50 метр йолча моттиге эггара сихагӀа вахар, кхелахоша цунна хьалхара моттиг елар. Коталонна гаргакхача цхьа гӀа мара боацаш вар Мартазанаькъан Мухьмад, из вахар баттерфляй оалача тайпара 50 метр, цунна дото совгӀат делар. Спортивни яхьашка берашца вахавар тренер, ГӀалгӀай Республикан наьк дара Федерацен президент Малсаганаькъан Ӏамархан», - аьлар хоамо.
