Яхьашка котало яьккха вай мехкахой турпалча Бресте хилар
Сийлахь-боккхача Даьймехка тӀем тӀа Котало яьккха 80 шу дизара хетаяьча яхьашка викторинаш, эссе оттаеча балха юкъе котбаьннараш шахьар-турпал лоархӀаш йолча Бресте гӀолла экскурси еш хилар.
Из хоам «Сердалога» бир яхьаш дӀайихьача Миннаца. «Эссех йолча яхьашка котваьлар Шадажанаькъан Ахьмад. Эггара хьалха республикера араваьнна, цхьаццанахьара дешарах мара йовзаш ца хинна моттигаш бӀаргаяйра цунна. Даьхе лораеш лаьттарий никъ дикагӀа байзар цун Брестски крепосте, музейшка гӀолла го боаккхаш, экскурси ечар къамаьлага ладувгӀаш», - йоах хоамо.
Иштта цӀихезача шахьара моттигаш йовза аьттув баьлар боккхача тӀемах йолча викторине эггара сихагӀа жоп луш хиннача Арчхой Мурада. Брестски крепосте моастагӀчоа духьаллаьттача вай бӀухой истори дикагӀа довза аьттув хул кхувш латтарий, тӀема сийлен моттигаш йовзаш хилча. Тахан чӀоагӀа лоархӀаме да цу оагӀонцара яхьаш, боламаш дӀакхахьар, тӀема истори даиман кердадахар, из деррига довзаш йола тӀехье хьалкхеяр.
