Мехка бахархоех ахаш, унахцӀена вахар леладара тӀехьа ба
04.07.2024 14:05
ДӀадахача шера хинначунга хьежача (46,8%), ГӀалгӀайчен нийсса ах бахархой, шоай вахара никъ, могашал лораеш, дӀабахьара тӀехьа ба. Цох дийцар ГӀалгӀай Республикан Кулгалхочо Келаматанаькъан Махьмуд-Ӏаьлас, ше тахан республикан Халкъа Гулламга Кхайкарал деш.
«2030 шу хьатӀакхачалехь, кхы а шиъ физкультурно-унахцӀенон комплексаш хьалъе лерхӀ Южне, Кердача Реданте», - аьлар ГӀалгӀайчен кулгалхочо.
Ер шу йистедалалехь, хьалъяь яргья БурокӀалхара спортивни комплекс, царна из чӀоагӀа лоархӀаме я.
Цул хьалхагӀа Шолже хьайийллар, бассейн а болаш, ФОК. Цул совгӀа, чӀоагӀъеш йоагӀа спортивни моттигий гӀирсий-технически кӀийле, цига Российски Федераце вӀашагӀтехача командаша спортивни толамаш дегӀадоаладу.
