Къаман викалашта карагӀдаьннар; РФ лакхача цӀерашца, орденашца белгалдир
ГӀалгӀайчен викалаша СВО мугӀарашка даьха тӀема толамаш, РФ лакхача цӀерашца, орденашца белгалдир. Цох дийцар, ше Халкъа Гулламга Кхайкарал деш, ГӀалгӀай Республикан кулгалхочо Келаматанаькъан Махьмуд-Ӏаьлас, из хоам «Сердало» газетага бир мехка кулгалхочун зарбан болх лелабераша.
Россе кхоъ Турпала яха цӀи, 68 Денала орден, 51 «Денал гойтарах» майдилг, 22 Жукова майдилг, 18 Суворова майдилг, 8 ордена мейдилгаш «Даьхен хьалхашка карагӀдаьнначох 2-гӀа дозал долча товрашцарча» ордена 8 мейдилг - из да тахан вай бӀухошта карагӀдаьннар», - аьлар ше къамаьл деш Махьмуд-Ӏаьлас.
Цо белгалдир, уж денал дола, шоай низ российски паччахьалкхен хьашташ кхоачашдара дӀабала кийча нах хилар.
«ЛаьрххӀа йола операци дӀайолайича денз, вайх хӀаране вахар хувцаденнад. Вайна тахан дика хов, вай декхар тахан моастагӀчо яхьача харцонна духьалъоттилга долга. Вай дукха кагий нах цу тӀема хьалхарча мугӀарашка латт», - аьлар Келаматанаькъан Махьмуд-Ӏаьлас.
Цо ловца баьккхар царна, шоай Даьхен хьалхашкара декхар дизза кхоачаш а даь, могаш-маьрша уж юхабахкар ловш.
СВО дӀайолаяьча хьалхарча деношка денз, российски бӀухошта ГӀалгӀайчера могаш дола новкъостал лоаттадаьд, иштта бӀухой дезал а хьаллаьцаб. Из болх массайолча хана дӀахьош ба.
СВО даькъ тӀа, дӀаяхача хана, республико бахьийтаб тайп-тайпара мухь; цу юкъе тӀема гӀирс, молхаш, кхачан даараш, кхы дӀаходараш долаш.
