Полице болхлоша хьалаьцар, наьха машин лочкъаяьр
ГӏалгӀайчен полице хьалаьцар 43 шу даьнна Владикавказа вахархо, цо дӀадахача шера Toyota Land CruӀser яха машин лочкъаяьяр Наьсаре вахача сага йохка оттаяь хинна. Ший ахча (из дар 7млн 100 эзар сом) наьсархочоа бӀаргадовнзар - машин эца венар цу машина тӀа а хайна къайлаваьлар, кхы гуча а валанзар.
«Ховш да, цу сага дукха мах бола внедорожник оалаш йола машин дика йий хьажа воалл со, аьнна, дӀаийца хиннилга.
Цу тайпара из дӀавахар цу машина тӀа а хайна, ше аьннача хана юха а ванзар. Из мичав ха хьажарах кхы хӀама а хиланзар. Полице болхлоша тӀатеӀӀа къахьегарах, из саг вола моттиг цул тӀехьагӀа гучаяьлар, полице отделе из Ӏочувигар. Хьем боацаш болх беча тоабан болхлошта ховш хилар из машин ший цӀер тӀа а яьккха (шийна хьатӀа а язъяь), кхыча сагага цо ехкалга. Цох хьаийца ахча шийна дезача дӀадахийтад», - аьлар «Сердало» газетага ГӏалгӀайче гӀолла йолча Россе МВД зарбан болх лелабераша.
