«Наьсарерча полице болхлошка латкъа венача сага дийцачох, «Ватсапе» гӀолла 45 000 сом ахча да шийна, аьнна, вовзача сагагара хоам бенаб цунга. Ахча дӀатӀадахьийта деза номер Ӏоязъяь хиннай зуламхоша. Ахча дӀатӀатессачул тӀехьагӀа, шийна вовзача сагага телефон техача мара гучадаьннадац, зуламхой цун «Ватсап» йохаяь чубаьннилга, ахча дехаш хоам цар дуккханахьа дӀа-хьа ахийталга», - йоах хоамо.

Геттара халача хьале оттарах, чӀоагӀа сиха ахча эш сона, аьнна, Ӏехаваьв из зуламхочо. Массанена ховш да, цу тайпара зулам чӀоагӀа даьржалга, цудухьа деррига техкачул тӀехьагӀа мара, ахча дӀатӀа ма ахийта, яхаш, хьалхадоах МВД болхлоша. Фийла хила, лорале интернете гӀолла баьржача тийшача балхах! Нагахьа шоашта тийшаболх хиннабале, Ӏалаьмате чехка дӀадаха деза полице болхлой болча. Иштта бола зуламхой сиха хьалаха аьттув балац, бакъда, хана йӀоахала хьакорабаь, шоашта доагӀа таӀазар дӀаэцаргда цар.