ГӀалгӀайчен полице гучадаьккхар, социальни ахчанца тийша болх лелабар
Россе МВД «Сунженски» яхача МО зуламхой тохкача болхлоша, ГӀалгӀайче гӀолла йолча Россе МВД ВОГ викалашца цхьана, тӀаийцар ше тийшаболх лелабаьб аьнна хьаена хинна 48 шу даьнна моттигера яхархо. Цу кхалсага, ше кхыча моттиге а йолаш, бокъонах ца йоагӀаш регистраци яьй Ханты-Мансийска автономни куран тӀа, ше цӀаккха а цига яьхайоаццаше, социальни ахчаш дукхагӀа эцар духьа ший кхелатанза долча берашта.
«2023 шера оагӀой беттагара 2025 шера тушола беттага кхоаччалца, цо хьаийцад 330 эзар сом паччахьалкхен ахча. ГӀалгӀай Республике гӀолла йолча РФ СК СУ Шолжа кхален тохкама отдело цу кхалсага духьала хьадийллар уголовни гӀулакх, Российски Федераце Уголовни кодекса 3-ча даькъа 159 статьях (хӀилланца ахча эцарах)», - аьлар «Сердало» газетага ГӀалгӀайче гӀолла йолча Россе МВД зарбан болх лелабераша.
Цу тайпара моттиг ГӀалгӀайчен бокъонаш лораяра болхлошта хьалха а нийсъелар, бакъда массане а кхетадаьдац, бокъонах ца доагӀаш леладер, гайна е ганза гучадоалаш хилар.
