«Наьсарерча Ӏарчакханаькъан цӀи лелаеча урам тӀа «Лада Гранта» яха тешам боацаш хийтта машин соцайир ГИБДД болхлоша. Хьалха наркотикаш бахьан долаш суд текха вахархо вар лоаллаш ваьгӀар. ДегӀа хьал хьагойташ чакхвала раьза воацаш, корзагӀваьнна хьувзилга зийра каьхаташ доацаш машин хехкаш лийннар», - йоах Ӏаьдалгара кхаьчача хоамо.

Ӏочувоалаваьча цун машина чура 275 грамм марихуана яха наркотик яьккхар МВД болхлоша. Цо белгалдаьчох, наркотик йоалла буц Алханчуртски канала юхера яьккхай цо. Наркотикашцара бувзам хоадабе лаьрхӀа воацачун духьала, гӀулакх хьадийллад Ӏаьдало.