Мехкахо Ӏехаваь зуламхо лохаш да МагӀалбикера Ӏаьдал

«МагӀалбик» яхача Россе МВД МО болхлой болча латкъа вера интернетерча зуламхоша Ӏехаваь мехкахо. Цо дийцачох, «Чери Фора» оалача машина оатхал йохкаш хоам корабаь хиннаб цунна интернета оагӀонашкара. Алексей ва со яьхача из йохкаш хиннача сага 25 эзар сом ахча дӀаийцад цунгара», - дийцар «Сердало» газетага МВД зарбан болх лелабераша.

Ахча каракхаьчача зуламхочо тешаваьв из, оатхал кийча я, 3-4 ди далалехь, хьакхоачаргья, аьнна. Из ха хьаэттача, накладной ийца дӀавахача мехкахочоа гучадаьлар цхьаккха хӀама хьакхаьча йоацилга. ХӀаьта из йохкаш хиннар телефона номер дӀаяьккха, цхьаккха тайпара бувзаме воацаш дӀаваьннав.

МВД болхлоша дехар ду бахархошка, боккъал а ма Ӏехадайта шоаш малашб ца ховча нахага, цхьаккха тайпара йохкар, эцар ма леладе бовзаш боацача нахаца интернете гӀолла! Уйла еш хила оашош леладечун, зуламхошта ахча дӀатӀа ма ахийта, шоай карта номераш ма хайта, хоадабе царцара бувзам!