ТӀема доакъашхошта гӀо дарах, ЮФО ГӀалгӀайчен массазара викал белгалваьккхар
Украинерча тӀема доакъашхошта новкъостал лоаттадара тӀехьа къахьегаш вола ГӀибухерча федеральни куран тӀара массазара ГӀалгӀайчен викал Дарсиганаькъан Мурад белгалваьккхар, цун къахьегама лакха мах оттабеш. Россе Герзашцарча низий Министерствон керттерча тӀема-унахцӀенонца бувзабеннача оагӀон хьалха латтача, РФ 2-ча класса паччахьалкхен гӀонча волча Тришкин Дмитре сийлен грамота яла оттавир вай мехкахо.
«Дарсиганаькъан Мурада грамот хьаеннар вар суда-унахцӀенонца ювзаенна йолча криминалистически экспертиза керттерча паччахьалкхен моттига шоллагӀча филиала кулгалхо вола Волков Анатолий», - дийцар тха «Сердалога» Москверча ГӀалгӀайчен массазара викалаш болча моттиге.
ТӀема операци йолаеннача дийнахьа денз, цун доакъашхошта эшаш мел бола кхоачам лоаттабеча доккха дакъа лоацаш хьавоагӀа Дарсиганаькъан Мурад. Доккха гӀо деш латт из, тӀема операцен юкъе лозабаьрашта а.
