ГӏалгӀайчен вахархочо набахта 1,5 шу доаккхаргда, лелхаш дола герз леладарах
Судо чӀоагӀдир ГӏалгӀайчен вахархочунна цхьан шера ялх бетта набахта яккха езаш ха теха хилар, иштта цо токхаргда 20 эзар сом гӀод а, лелхаш дола герз леладарах, яхаш, дийцар «Сердало» газетага бокъонаш лораераша.
«ГӏалгӀай Республикан Илдарха-Гӏалий тӀарча судо, 1996 шера ваьча моттигерча вахархочунна кхел йир, из лелхаш дола герз леладеш хиларах.
Белгалду, цо бокъонах доацаш ше вахаш волча Илдарха-ГӀалий тӀа, Заьзганаькъан урам тӀа, карара кхувса дӀандарг лелаяьй. Из унзара герз 2023 шера лайчилла бетта 9-ча дийнахьа ГӏалгӀай Республике гӀолла йолча Россе УФСБ болхлоша гучадаьккхар, шоаш лаьрххӀа бола болх дӀахьош», - йоах хоамо.
Республикан тохкам беча болхлоша зуламца дувзаденна гӀулакх хьадийллад, РФ Уголовни кодекса статьях доагӀаш ма хиллара.
