Москверча массазарча викала фусаме, кхетам лакха барашта викторина ю
Оагӏой бетта 5-ча дийнахьа, Гӏалгӏайчен массазарча викала фусаме Кагирхой кхело «Гӏалгӏайче: гӏалашкара таханарча денга» яха викторина дӏахьу. Из хоам «Сердалога» бир Гӏалгӏай Республикан паччахьалкхен зарбан болх лелабераша.
Кхетаче дӏаяхьа лерхӏ цӏиезача «Фу? Мичахьа? Маца?» яхача хаттарий кепара. Хаттараш викторина керттерча цхьан даькъ тӏара хьаэцаш хургда.
Йиъ тоаба, хӏаранена чувоагӏаш ялх саг волаш, хьожаргья шоашта фу хов исторех, ӏадатех, халкъа багахбувцамах, гӏалгӏай меттах, литературах, архитектурах, таханарча толамех лаьца.
«Оаха кийчъяьй тоабашта кхоъ тематически оагӏув: «Денал, кхера. Тӏехьале», «Дийна хий», «Хургдолчунга хьажар», иштта капитанаш тӏеххьарча яхье боала оагӏув я «Хьаькъалаша къовсар», - аьлар Гӏалгӏайчен массазарча викала балха новкъостьаша.
Викторина сийрда, безаме хургья.
