«Андрей Владимирович» яха зуламхо лохаш да вай мехкара Ӏаьдал
250 эзар сом совгӀа ахча кхалсагагара лочкъадаь зуламхой лохаш ба МагӀалбикера полице болхлой. Из хоам «Сердалога» бир цу моттигера.
«Россе МВД «МагӀалбик» МО яхача моттиге латкъа енача мехкарча яхархочо баьча лоткъамах, WhatsApp оагӀонга гӀолла бувзаме ваьннача, банка болхло Андрей Владимирович ва ше аьннача сага цун наьнага аьннад, брокерски счёта тӀа дӀатӀадена 550 эзар сом кхыча банковски карта номер тӀа дӀатӀадаккха деза, аьнна, иштта тешам бола саг керте оттаваь.
Нанас йиӀий цӀи яьккха, цунга телефон етта болабеннаб зуламхой», - йоах тхогарча хоамо. Дукха къамаьл дийца, из тешае аьттув баьннаб зуламхой, ахчан гӀулакх тешамегӀа хилийтара эшаш да, аьнна, кхыча номер тӀа из дӀатӀадаккхийтад. Цул тӀехьагӀа, цхьан кхоачамбоацарашта тӀагӀолла дӀаьхлуш да из гӀулакх, аьнна, тешаяь, кхыча банкера кредит даккхийтá, из шоай номер тӀа дӀатӀатассийтад. Цхьа юкъ яьлча, хайнад кхалсага ше Ӏехаяьлга.
256 эзар сом ахча да зуламхоша цунгара дихьар. Полице болхлой ба, цу гӀулакха оарцагӀбаьнна болх дӀахьош. Бахархошка кхайкарал ду МВД, боккъал а оашош леладеча хӀаман уйла еш, фийла хила! Малашб ца ховча нахаца бувзаме ма дувла, цхьаннахьа ахча дӀатӀа ма тувса, шоай картан номераш дӀа ма ала сагага. ХӀаьта шоаш Ӏехадаьдале, Ӏалаьмате сиха гӀо полици йолча, шоашта зуламхоех мел ховр дӀадувца.
