Полице колледжа курсанташца кхетаче дӏайихьар Наьсарерча бокъонаш лораераша
ЧОУ СПО «Къилбаседа Кавказа полице колледжа» курсанташца кхетаче дӏахьош хилар мехкарча МВД экстремизм яхача зулама духьале лоаттаеча оагӏон болхлой. Из хоам «Сердалога» бир МВД.
«Кхувш латтарашта вахаре лораде дезараш хьалхадаьхар бокъонаш лораераша. Из доккха зулам вай мехка цадаржийтара тӏехьа къонабараша малагӏа дакъа лаца деза белгалдир»,- йоах тхога бенача хоамо. Терроризм, экстремизм яхар доаржадеш лелараш хӏетта кхийнараш цу юкъеоза гӏертилга, къонабарий сакхетам тувлбара, уж кегабара тӏехьа цар малагӏа хӏамаш леладу дийцар курсанташка.
Иштта царна хьалхадаьккхар, тайп-тайпарча интернета оагӏонашка гӏолла шоай бӏеха зулам доаржаде хьожарашца цхьаккха тайпара бувзам лелабе, цар яхар теркалде, хьаллаца йиш йоацилга.
Моллагӏа тешаме ца хета хӏама зийча, ӏалаьмате чехка хоам бе беза МВД болхлошка. Белгалде деза, къонача тӏехьенца иштта йола кхетаченаш дӏакхахьар тахан лоархӏаме, пайда беш долга.
Курсантий хаттараш доашхаш болх дӏабихьар цу кхетаче. Во доаржадераша эггара чӏоагӏа шоай бӏехача гӏулакхашка чуозараш къонабараш ба; цудухьа, цар сакхетам, нигат, уйлаш лорадара тӏехьа, къахьега деза вай тахан.
