Вайцигара предприятеш хӏара шера тешшаме дакъа лоацаш я арахьарча тӏаьрге
Дӏадахача шера кхоалагӏча квартала гойтамга хьежача, Гӏалгӏайче кхолла хӏамаш доазол арахьа лоаттаю 56%. Республикан экспорт совйоалаш йоагӏа, яхаш, хоам бу «Сердало» газетага Гӏалгӏай Республикан зарбан болх лелабераша.
«Из дика толам ба, цо хьагойт арахьарча мах бара даькъ тӏа вай хӏама тешшаме лоаттадеш хилар.
Оаха дика вӏашагӏбеллаб экспортёраш хьаллоацаш бола болх. Карарча шера дика болх бир республикан Кулгалхочун чуйоагӏаш йолча Экспорта кхело, хоадам бола хаттараш кхоачашдир.
Массайолча оагӏорахьара юкъедоаладаьд экспорта хӏама лоаттадара хьалаш. Тахан экспорт хила езача 15 оагӏонах, 13 болх беш я. Цар дика таро лу мехка хьалхашка латта декхараш кхоачашде», - аьлар Келаматанаькъан Махьмуд-ӏаьлас.
Цо белгалдир, толамаш дика хилар бахьан долаш, Гӏалгӏай Республикан экономически таронаш а лакхлуш йоагӏа.
Цу даькъ тӏара болх дӏахо а дӏахьоргба Гӏалгӏайчен ӏаьдало. Цу юкъедоагӏа предприятеш хьаллацар, арахецаш йола продукци тайп-тайпара а дукхагӏа а хилийтар.
