ГӀалгӀайчен викалá Казахстана доккха совгӀат делар
Къамашта юкъера бувзам лелабара даькъ тӀа дика къахьегарах, юкъарлон барт чӀоагӀбарах, Кахастанерча вай мехкахой викала Келиганаькъан Ювсапа лакхара паччахьалкхен совгӀат, вошал долча паччахьалкхен орден елар. «Ел бірлігі» («Халкъа цхьоагӀо») цӀи йола совгӀат да из. Казахстана халкъа Ассамблея XXXӀV сесси йолаш, мехка Президента Токаев Касым-Жомарта къаьстта ше дӀаделар из совгӀат.
ГӀалгӀай Миннаца зарбан болх лелабераша яхачох, Келиганаькъан Ювсап ва Казахстана къамий Ассамблея Кхела доакъашхо, «Вайнах» яхача Казахстана нохчий, гӀалгӀай Ассоциаце сопредседатель.
«СовгӀат хьаэцаш, Келиганаькъан Ювсапа баркал аьлар иштта лакха мах ший балха барах, цо белгалдир, совгӀат даларца цхьана «Вайнах» Ассоциаце берригача викалий болх белгалбаь хилар», - аьлар ГӀалгӀай Республикан Миннаца хьабайтача хоамо.
