Вай мехкахо «Кхетам балара керда философи» яха преми яккха лаьрхӀа я
Наьсарерча №15 йолча ишкола кулгалхочун берий юкъарлон цхьанкхетара болх лелабеча, кхетам балара даькъ тӀара гӀонча йолча Кхоартой Фатимай дешархоша шоай хьехамча оттаяьй «Кхетам балара керда философи» яхача 3-ча Ерригроссийски берий преми яккха. Фатима цаӀ мара яц ГӀалгӀайчера цига преми яккхара юкъейихьа.
«Из йоккха яхь дӀахьош я «Российски Федераце бахархошта патриотически кхетам балара» йола федеральни проект, иштта «Дешар» яха къаман проект кхоачашъеча, моттигашкара дикагӀа бола говзанчаш лахара, цул совгӀа, вай мехка мах бола ганз кертте а оттаеш, кхувш йоагӀача тӀехьенна лерттӀа кхетам луча даькъе дика толамаш доахараш белгалбахара», - аьлар «Сердало» газетага Кхоартой Фатимас.
«Кхетам балара керда философи» яхача Ерригроссийски берий преме моттигера болх дӀаболабелар. Из дӀахьоргба ардара бетта 17-ча денга кхаччалца. Ерригроссийски яхьа дакъа дӀахьоргда ардара бетта 23-ча дийнахьа денз, лайчилла бетта 12-ча денга кхаччалца. Юкъара бӀал дӀахьоргба Москве оагӀой бетта, цига гуллургба преми яккхара юкъебаха дикагӀбараш.
Карарча шера доакъашхошта юкъе йоккхий яхьаш я дӀахьош, хӀана аьлча котало яккхара юкъебаьннаб Россе ерригача моттигий викалаш. Бакъда, Кхоартой Фатимай дика таронаш я котало яккхара, цо кхыйолча яхьашка дакъа лаьцад дукхаза, цудухьа цун цу даькъ тӀа балха говзал я.
