ЦКНР вебинаре дакъа лоацаш хилар вай мехкахой
Республикерча къаман кхоллама, культуран оагӀонцарча кхетаченех долча ЦӀен кулгалхочун гӀонча йола Котанаькъан Марем, этнографех болча оагӀон хьалха латта Хутенаькъан Тамила, методист йола ЦӀолой Зарема Алтай республикерча зӀамигача къамий халхарца дувзаденна Ӏадаташ дийндарах йолча интернете гӀолла еча кхетаче (вебинаре) дакъа лоацаш хилар. Из дӀахьош хиннараш бар Поленов В. Д. цӀи лелаю Россе къамий культурах дола Россе Паччахьалкхен кхоллама цӀа, Алтай республикера къаман кхолла моттиг.
Россе къамий «Этнодунен тӀехьале» яха культурацара онлайн-кхетаченаш яр цига йоаржаеш. «Вебинаре экспертий болх дӀахьош хиннараш - Алтай республикерча зӀамигача къамий Ассоциаце доакъашхой, «АйКюн» яхача ансамбла кулгалхо йола Набутова Айчюс. Россе дукхача хана денз дахаш долча къамий культуран оагӀонцара кхоане лораярах дийцар кхетаче гулбеннараша», - хоам бу «Сердалога» Котанаькъан Марема.
Калужски областерча кхоллама оагӀонцарча «Центральни» оалача ГБУК «Къаман кхоллама, кинон ЦӀен» моттига болхло йолча Воронцова Аллас вебинаре доакъашхошта йовзийтар «Россе къамий кхоанен го йиш йола маркераш» яха йоккха, ерригача Россе проект. РФ дукхача хана денз дахаш долча къамий итташ шерашцарча къамашта юкъерча оагӀонца йоаржаергья из проект, 2032-ча шерга кхаччалца дӀахьош.
Цу проекта хьалхашка латта керттера деккхараш - культурацара Ӏадаташ лорадар, дукхача хана денз дахаш долча къамий меттай хьал хьаллацар, гӀо дар, культуран оагӀонцара бувзам вӀаший чӀоагӀбар. Россе дахаш долча къамашта юкъера культуран оагӀонца дувзаденнараш хьаллацара тӀехьа лоархӀаме, боккха болх хургба цох.
