«Сурхарбан» яхача бурятий цӀайна юкъе дакъа лоацаш хилар вай мехкара викалаш
19.08.2025 14:59
Калининградски областера вай къаман викалаш «Сурхарбан» яхача бурятий Къаман цӀайна юкъе дакъа лоацаш хилар. Из хоам «Сердалога» бир Миннаца болхлоша.
«ЦӀай дӀахьоча кхетаче бурятий латарах йолча яхьашка дакъа лаьца; шоай низ, кадай хилар гойтар цар. Спортсменаша Оздой Ислама, Йовлой ХӀарона шоллагӀа, кхоалагӀа моттигаш яьхар яхьашка», - дийцар тха газетага.
Бурятий юкъарлен оагӀон кулгалхочо лакхача маьхе оттабир мехкашта юкъера бувзам, баркал оалаш каьхат делар цо ГӀалгӀай къаман культуран автономена хьалха латтача Ваделанаькъан Саламханага. Республикерча Миннаца баркал аьлар; къамашта юкъера бувзам, барт чӀоагӀбеш, культуран оагӀонцара Ӏадаташ доаржадеш къахьегача мехкахошта.
