ГӏалгӀайчен викалаш дакъа лоацаш ба, РГО юбилейца бувзабеннача гулламе
Москве дӀайолаелар Эрсий географически юкъарлон съезд, цун 180 шу дизара хетаяь я из. Цу йоккхача кхетачене дакъаь лоацаш бар, берригача мехкара хьалха латта Ӏилманхой, тохкамхой. ГӏалгӀайче дика дакъа лоацаш я цу съезда балха юкъе. Республикан викалашта юкъе я моттигерча РГО даькъа кулгалхо, ГӏалгӀай паччахьалкхен университета ректор Ӏалбаканаькъан Фатима, иштта «Географе, вахара кхерамзлен» кафедра йоккхагӀа йола хьехархо Ӏарчакханаькъан Марет, аьлар «Сердало» газетага ИнгГУ зарбан болх лелабераша.
«Эрсий географически юкъарлон балха юкъе дакъа лаца йиш йолаш хиларо таро лу географе, экологе, геоантропологе, туризма, дешара, геокультуран лоархӀаме хаттараш дувца, иштта вай мехка таронаш федеральни майдан тӀа йовзийта»,- аьлар Ӏалбаканаькъан Фатимас.
Программа чудоагӀаш да таханарча заман географе, экологе, Ӏалам леладара хаттараш. Доакъашхоша дувцаргда лоархӀаме Ӏилман тохкамаш дара дош, шоайла балха говзал дӀа-юха эцаргья, Россе географе Ӏилма дегӀадоаладарца ювзаенна.
Эрсий географически юкъарло хьакхеллай 1845 шера, из къаьнагӏчарех цаӏ я, иштта дика йовзаш йола Россе Ӏилман цхьанкхетар я. Ше болх беш йола ши бӀаь шу гаргга йолча хана, цо юкъеденад мехка доазош тохкаш, географе Ӏилма Ӏомадеш, бахархошта юкъе географе дешар доаржадеш мах баь варгвоаца дакъа.
