«Ӏомадаьр. Лектор» яхача ерригача Россе яхьашка дакъа лоацаш хургба вай мехкахой
Берригача мехкара начӏал дола спикераш гулбир «Ӏомадаьр. Лектор» яхача ерригача Россе яхьий пхелагӀча бӀало. Яхьашка дакъа лаца ловш, вай мехкарча 28 лектора дехар чуделар цига. «Россе къамий цхьанкхетар» яхача оагӀонца дакъа лоацаш я МагӀалбикерча № 5 йолча ишкола хьехархо Къамурзой Захрат.
«Дешара хьалхалаттар» яхача яхьашка белгалъяьнна я из. Ший лекцешка эрсий, гӀалгӀай, ингалсий кицай маӀан вӀаший дусташ, цу оагӀонцара керттердараш белгалду цо: дезал, дезала хьехам, дешарцара безам. Иштта цига дакъа лоацаш ва «Концепт» яхача дешарах, хӀама доаржадарах йолча моттига доакъашхо, «Къаман яхь» яхача преме лауреат вола Охценаькъан Ислам. Риториках, уйла ярах лекцеш еш цо, иштта Ӏилман оагӀонцара проекташ йоаржаю», - дийцар «Сердалога» дешареи Ӏилмани гӀулакхех йолча министерстве.
Белгалде деза, яхьашка дакъа лаца ловш хиннараш дукха болга. Ший моттиг тоаярах, лакхаленашка кхача гӀерташ къахьегарах болча оагӀонца дехар чуденнараш геттара дукха бар. Иштта терко тӀаозаш дар экологеца, туризмаца дувзаденнараш.
«Экологи, туризм» яхача оагӀоно гонахьарча Ӏаламца, туризм йоаржаярца дувзаденнараш дувца ловраш тӀаэзабар.
«Россе къамий цхьанкхетар» яхача оагӀоно тӀаэзар Россе моттигашкарча культурах, къамашта юкъерча бувзамах дувца ловраш.
«Ӏомадаьр. Лектор» яхача яхьаша гучабоах лакха начӀал, говзал йола, шоашта ховр, дайзар дуккханешца декъа ловш бола къахьегамхой. Россе дешара оагӀонцара моттиг тоаеш бола боккха болх ба из тахан.
