Гӏалгӏайчен СЗФО викалаш кийчлуш ба, Коталон 81-ча шерга
Хьатӏадоагӏача шера, аргӏанара Сийлахь-боккхача Даьймехка тӏема Коталон ди дездеш хиларах, Гӏалгӏай Республикан Санкт-Петербургерча, Ленинградски областерча викалаша лаьрхӏад, Санкт-Петербургерча паччахьалкхен герзашцарча низий, Ленинграда блокада музее дагалоаттама «Гӏалгӏай Сийлахь-боккха Даьймехка тӏом латташ» яха кхетаче дӏаяхьа. Цу даькъе эшаш дола архивни каьхаташ дӏадийхар республикан ГАСо.
Укх деношка мах бола каьхаташ кхоачадир Нева хи тӏа уллача шахьаре. Цул совгӏа, кхетаче хилар Гӏалгӏай Республикан бокъонаш йолча СЗФО массазарча викала Овшанаькъан Муслима, Гӏалгӏай Республикан ГАС кулгалхочунца Ховтанаькъан Русланаца, цига дийцар из кхетаче вӏашагӏйолларах дола хаттараш.
«Дагалоаттама кхетаче дӏаяхьар, Ленинград лораеш лаьттача тӏема бӏухой сийна хетадаьд, Котало йоаккхаш гӏалгӏаша юкъедена дакъа гойтара. Архива болхлоша доккха дакъа юкъедера каьхаташ гулдеш, цо таро лургья из кхетаче сийрда а дика а дӏаяхьа. Оаха баркал оал Гӏалгӏай Республикан ӏаьдала, юкъарлон викалашта из лоархӏаме проект хьаллацарах», - аьлар СЗФО викалаша.
