Вай мехкахоша дакъа лаьцар, Россе библиотекай кулгалхой кхетаче
Российски паччахьалкхен библиотеке чакхъяьлар хӀара шера дӀахьош йола мехка центральни библиотекай кулгалхой кхетаче. Из дӀайихьар белгалонца «ЧӏоагӀача паччахьалкхен- чӀоагӀа библиотека» яхача белгалонца. Цо гойтар Россе культуран хьаькъалера таронаш чӀоагӀъеча библиотекаша лоаца дакъа. Цига баха хилар дукхача республикашкарча библиотекай викалаш. ГӏалгӀайчен викал яр Янданаькъан Жамалда цӀерагӀча библиотека кулгалхо Гӏазданаькъан Радима, цун информатиках вола гӏонча Гиренаькъан Микаил.
«Кхетачен программанна чудоагӀаш дар библиотекай хургдар белгалдеш дола дукха хаттараш. Цига дийцар культуран тӀехьале лораяра даькъ тӀа библиотекашта хьалхашка латтача декхарех. Доакъашхой хьежар библиотекай программашка гӀолла паччахьалкхен политика кхоачашъярга. Иштта дийцар библиотекай болхлой говзал лакхъярах а, къона болхлой юкъебахарах а. Библиотекай болх таьрахьашка баккхара хаттар а дийцар доакъашхоша, шоаш къамаьл деш», - аьлар «Сердало» газетага ГӏалгӀайчен къаман библиотеке.
Кхетаченах лоархӀаме майда хилар, шоайла балха говзал дӀа-юха эцара, таханарча заман хаттараш библиотекашка гӀолла кхоачашдара хьал довзара, цхьана хоадам боллаш цу даькъ тӀара хаттараш тахка таро кхоллара. Цу цхьанкхетара чаккхе еш, вӀашагӀдохкаргда дӀахо библиотекаша бе безача балха керттера декхараш.
