Гӏалгӏайчен яхархочоа «Къахьегама саг» яха Къаман преми елар
Москве дӏайихьар лаьрххӏа йола «Къахьегама саг» яха Къаман преми луш хинна кхетаче. Из лоархӏаме ди белгалду шергара шу массаза доал, ерригача Россе котало яьккхараш гулбеш. Преме белгалбу балха говзал лакха йола къахьегамхой.
Цу кхетаче, Гӏалгӏайчен викалаш болаш, бахар Инаркъерча №12 йолча юкъерча дешара ишкола хьехархо Кхоартой ӏаьлий ӏашат, ӏаьлий Марет.
«Дезала къахьегама ӏадаташ» яхача даькъ тӏа «Къахьегама саг» яха преми елар Кхоартой ӏашата - эрсий метта, литературан хьехархочоа. Кхоартой дезал, дукхача хана денз, хьехархочун даькъ тӏа къахьегаш хьабоагӏарех ба, цхьа ноахал хинна ӏац цу ишколера цар хьийха, дийша арабаьнна. Юкъара дезала къахьегам хьаийцача, 600 шу балха дӏаденна нах ба уж. Из духхьал статистика хинна ӏац, из да шоай профессена мутӏахьа хилара истори», - аьлар «Сердало» газетага Гӏалгӏайчен дешара, ӏилман Министерстве.
Карарча шера къаман преме федеральни чаккхенга кхаьчар мехка 62 моттигера доакъашхой. Царна юкъе – балха профессей викалаш, балха говзал йола хьехамчаш, къона говзанчаш, къахьегама тӏехьен викалаш, шоаш хержа професси итташ шерашка лелаеш бараш.
Преми луш яр ялх даькъ тӏа, царех хӏараяр къахьегама оагӏув хьаеллаш яр. 2025 шера Лауреаташ- уж ба дика масал гойташ бараш, шоай мохк дика дегӏабара кӏоаргга кӏийле еш, професси лораеш, дезала ӏадаташ лоархӏаш дӏаболхаш бола нах. Цар исторе хьалхадоаккх, къахьегам из болх хинна ӏац, вай кхоанарча тӏехьенна юта тӏехьале я из.
