«Кердадараш юкъедоаладар цкъа дIахьош бола болх бац. ДIахойодача хана а, дикагIа тоабеш дIабахьа лаьрхIад вай наькъаш тоадеш бола болх», - аьлар вай Мехкадас Келаматанаькъан Махьмуд-Iаьлас, цу лоархIамеча гIулакхах дувцаш.

Мехка кулгалхочо белгалдир, «Наьсаре-МагIалбик-Лохера Курп-Терек» яха никъ моллагIа болча хаоттама духьалъотташ, дуккхача шерашка ца бохаш улларгболаш, ший тайпара тоабеш кийчбаь асфальта маркхал буллаш тоабаьлга. Наькъашкара кIоагаш дIадукъаш бола болх цига лелабе безаргбац. ЧIоагIа, дика никъ ба цига биллар.

Магасерча Чахкенаькъан цIерах болча урам тIа термопластикови оала белгало яьй. Иштта дуккхача шерашка хIетта йиллача санна латтаргья из, кхыдолча басарел сийрдагIа, ара боад эттача а дикка зувш, гаьннара воагIаш хоалуш хургья из.

Мехкадас белгалдечох, вай наькъашкара хьал дикка аттачахьа даккха, хатараш кIезигагIа хилийта мег цу балхо. Шахьарашкара, юрташкара наькъаш боаггIача боараме, кхераме доацаш хилар эггара лоархIамегIа долча гIулакхех да.