МагIалбика кхален администраце, бахархой тIаийбеш ди хилар
МагIалбика кхален администраце кулгалхочо Къоастой Iаддал-Хьамида дакъа лоацаш, бахархой тIаийбу ди дIадихьар шахьаре. Кхален администрацешкара кулгалхой, иштта кхыбола хьакимаш бар цига гулбенна. Бахархошта къувлараш малагIаш да техкар кхетаче.
«Инаркъера бахархой леткъар, шоай юрта ток ца тоъаш, хало я аьнна. ДIа-хьа дийцача гучадаьлар, цигара трансформатор лертIачара баьннилга. Кхален кулгалхочо хьакимашта тIадиллар; ма хулла сихагIа из хьал меттадоаладе, аьнна. Иштта Кердача Редантерча СВО доакъашхой цIагIара нах чIоагIа сатем байна бар; ток боаггIача боараме хьакхачац шоашта, яхаш. Эшаш мел бола кхоачам вIаштIехьабаьккха, болх сиха дIаболабе безилга белгалдир кхетаче. Вахарерча тайп-тайпарча кхоачамбоацарех дувцаш бар кхален бахархой», - дийцар «Сердалога» цу моттигера.
Кхален кулгал деча Къоастой Iаддал-Хьамида белгалдир, иштта йола кхетаченаш бахархошца дIакхахьар лоархIаме долга, хIана аьлча цу тайпарча наькъаца мара довзац ма дарра наьха вахарера кхоачамбоацараш, бахархошта къувлараш, меттадоаладе дезараш.
