Нувхаш дӏакхувсача моттигашца ювзаенна халонаш хьоахайир, Мехкадаьца хиннача къамаьла юкъе
Магӏалбика кхален Соагӏапча бокъо йоацача моттиге хьаӏайна латта нувхий гув чӏоагӏа бахархой саготдеш ба. Мехкадаьга хаттараш телаш, телевидене гӏолла дӏахьоча кхетаче айдир из гӏулакх цу юртарча вахархочо Бӏарахой Адама. Цо белгалдаьчох, кашамашта ӏотӏакхаьча бала боалла нувхий гув, юрта куц толхадарал совгӏа, экологени бахархой могашалаи зе деш ба.
Магӏалбик-Шахьаререи Магӏалбика кхален моттигашкареи нувхашца дувзаденна гӏулакх терко лоаттаеш да, яхаш, белгалдаьккхар Мехкадас.
Цу гӏулакха доазув къоастадаьд, 2027-ча шера, мехкадас белгалдечох, Юкъерча Ачалкхен доазон тӏа таханарча хано дӏадеххача тайпара йола полигон хьалъергья. 2029-ча шера йистебала безаш ба из болх. Магӏалбика кхален бахархой, нувхий гувнех хьаухаш болча кӏуро готтабаь, леткъаш хилар хьоахадир Мехкадас.
Из хӏама иштта дита йиш ярех дац! Цу моттигерча хьакимашта тӏадиллар Мехкадас цу гӏулакхага хьажар.
