Укх бетта 30-ча дийнахьа ярмарка дӀахьоргья вай мехка
26.03.2024 09:44
Насарерча культуран цӀен юхерча доазон тӀа, тайп-тайпара даараш дола ярмарка дӀаяхьа лерхӀ укх бетта 30-ча дийнахьа. Из хоам «Сердало» газетага бир мехкарча кабмино.
«Цунна тӀехьа йоагӀа ярмарка кердача бетта 5-ча дийнахьа дӀахьоргья ГӀажарий-Юртарча культуран цӀен юхерча Первомайски оалача урам тӀа. ХьатӀабоагӀача бетта 6-ча дийнахьа, Магасерча Аланий коанаӀарашта юхе, хьежаргба кхача бохкараш мехкахошка», - йоах тхогарча хоамо.
Белгалде деза, из гӀулакх вай мехка дикка даржаш латтилга. Тикашка, базар тӀа дохкачул дарегӀа нийслу цига дулх, хьоар, чкъаьра, ялат, даьтта, сомаш, хаьсасомаш, мерза даараш. Ярмарке массахана дукха адам хул, цига го йиш я, вай мехкахой мел хьинаре къахьегарех ба.
