«Профессионалитет» яхача проекто Гӏалгӏайченна керда таронаш хьаелл
Карарча шера Гӏалгӏайче хьалхара юкъейодаш хилар «Профессионалитет» яхача дешара проекта. Цу яхье котъяьлар Ӏарпенаькъан Ю.А. цӏерагӏа политехнически колледж, цо гойтар дика говзанчаш кхебара программа, доагора-энергетически комплекса даькъ тӏа. Федеральни проекта чудоагӏаш, Россе Паччахьалкхено хьожадаьд дика ахча, 77,4 млн сом вайцига хӏанзарча хьалий дешара оагӏув хьакхолла.
«Профессионалитете» дакъа лацар - из лоархӏаме гӏа ба республике профессиональни дешар дегӏадоаладара. Кердача даькъ тӏа таро хургья говзанчаш кийчбе, иштта дешара урхалленашта, предприятешта юкъера бувзам чӏоагӏбе», - аьлар Гӏалгӏайчен паччахьалкхен Председатела Сластенин Владимира.
Мехка Паччахьалкхено кхетаче дӏахьош, Сластенина кулгал а деш, хоадам болаш дийцар проект кхоачашъярца дувзаденна керттера хаттараш.
Къаьстта йола терко тӏаяхийтар проектно-сметни каьхаташта, кердача гӏишлонна моттиг кийчъяра, иштта дешара хьалаш вӏашагӏдохкара.
Гӏалгӏайчен дешара, ӏилман министерствос кийчон болх хӏанззе а дӏабихьаб. Укхаза чӏоагӏъяьй дешара программа, эшаш бола гӏирс белгалбаьб, иштта чӏоагӏо яьй колледжа субсиди даларца ювзаенна.
Ма хулла дукхагӏа пайда луш йола проект юкъеяккхара, тӏехьара тӏа ахча лургдолаш да. Цо таро лургья лаьрхӏар кхоачашде, таханарча заман дешара оагӏув хьакхолла.
«Профессионалитет» яхача проекто хьаелл Гӏалгӏайчен профессиональни дешара керда таронаш, иштта мехка керттерча экономикан даькъ тӏа дика кийчо йола говзанчаш кхебара.
