Магасерча «Оптовик» яхача тикан болх, кхоачамбоацараш юкъе долаш ба
«Оптовик» яхача Магасерча тико ший болх малагӀча боараме дӀахьош ба тахка арабаьлар шахьара администраце, иштта цу оагӀонцара тӀахьожама болхлой. Дукха кхоачамбоацараш гучадаьлар рейд дӀаяхьа арабаьннарашта.
«Тика чу болх берашца къахьегама оагӀонцарча бартчӀоагӀама болх дӀабихьабоацилга гучадаьлар, къахьегама бокъонаш ца лоархӀилга да из. Бохкача кхачанцара гӀулакх а воча хьале дар, иштта кара ахча дӀаденна мара хӀама эца аьттув а бац цу чу. ХӀаьта, эггара керттердар - цӀи ялара кхерам бола бахьанаш теркалдир цига», - дийцар «Сердалога» шахьара администраце.
Кхоачамбоацараш Ӏалаьмате чехка юстардаха, аьнна, тӀадиллар тикан даьна, гӀод тохаш. Шахьара мэре белгалдир, хӀама йохкаш мел йола моттигаш оттаяь бокъонаш лоархӀаш, шоай болх кхераме боаццача тайпара дӀабахьа декхарийла йолга. ХӀаьта уж хӀамаш лорадеш ца хилча, гӀод тохарал совгӀа, тикан болх юхасоцабе йиш я.
Цу оагӀонцара болх, дикка тӀахьожам лоаттабеш, дӀабахьа лаьрхӀа я шахьара мэри.
