СВО вахар хаьдача бӀухочун цӀен-нанна гӀо деш я психолог
Украинерча тӀема операцена юкъе цӀен-да вийна хало кхаьчача, дог деха кхестача кхалсага гӀо деш я мехкара психолог Пхьогоранаькъан Райшат. «Сердалога» из хоам бир «Даьхен лорбой» яхача ганза моттигерча филиала болхлоша.
«Ший болх дика бовзаш йола психолог бӀухочун наьна, Йовлой Райшата, цӀен-наьна Овшанаькъан ПаьтӀамата дега хьал меттадоаладе, цар бала кӀеззига байбе хьежар. Боча хинна саг дӀаваьнна, деррига вахар Ӏаьржденна кхестар уж. Ший мел йолча говзалца цар хьал аттачахьа даккха, дега цхьа кӀеззига хинна а тем хургбар де хьежар психолог», - йоах тхогарча хоамо.
Ганза болхлоша белгалдечох, бӀухошца санна, массазарча шоай вахара хьалá уж тӀабоалабеш, болх дӀакхухь цар дезалашца а. ТӀема аренашка къонгаш байнарашца массахана бувзам лоаттабу ганза болхлоша.
