ПСО «Ӏарамхи» шоай говзал чӀоагӀъеш хул хӀара денна
ХӀара денна хӀана дац аьнна; хала, бехктокхаме декхараш кхоачашде дезаш хул наха гӀо деш, уж моллагӀча хатарах кӀалхарбоахаш лелача «Ӏарамхи» яхача тоабан доакъашхой. Из хоам «Сердалога» бир МЧС болхлоша.
«Аттачарех бац цу наьха болх. Спорта яхьашка гулбеннарий кхерамзле лораеш, хьунагӀара цӀераш йоаеш, машинаца хатар хиннача оарцагӀъухаш, хьунашка, лоаман моттигашка тувлбеннараш лехаш, иштта кхыдола дукха лоархӀаме, хала декхараш кхоачашдеш, хьабоагӀа уж денал дола нах», - йоах хоамо.
«Ӏарамхи» яхача тоабан болхлошта шоай гӀулакх дика довз, массахана шоай болх бехктокхаме чакхбоаккхаш хьабоагӀа уж. ХӀара шера дукха туристаш тӀалатташ; кхераме, хала наькъаш долча ЖӀайрахьа кхале хул уж къахьегаш. МоллагӀча хана, дукха декхараш хул цар кхоачашде дезаш. Деналах бизза болча цу къаман къонгашта хов, моллагӀа хатар ийккхача мишта, фу де деза.
