ГӀалгӀайчен культуран болхлой кийчлуш ба доал деча даькъ тӀара хоржамаш дӀадахьа
06.09.2023 11:57
Шолжа кхален культуран ЦӀагӀа кийчлуш ба, цаӀ дола хоржамий ди дӀахьош кхадж тасса. Цу культуран салоӀама моттигерча болхлоша, ГӀалгӀайче тов бетта 10-ча дийнахьа дӀахьош долча хоржамий денга кийчо еш, шоатта дийнахьа балха арабаьнна, массанахьа шоай доазон тӀа лостам бир. Кхадж тасса хьабоагӀараш хозача цӀенонца тӀаэца лаьрхӀад цар.
«Оаха, культуран цӀен чухьнахьа меттел, арахьа а лостам баьб, гобаьккха дола тхоай доазув чулоацаш. Эшача басараш хьекха, кӀираш теха пенаш сийрдадаьха, гӀишлон тӀа ягӀа паччахьалкхен байракхаш кердаяьха, деррига доазув цӀендаь, гаьнашта кӀир теха, гонахьара нувхаш хьагулъяь, уж дӀаяьха къахьийгад», — аьлар «Сердало» газетага Шолжа кхален культуран цӀен кулгалхочо Матенаькъан Ӏайшета.
