Лоаман моттигашкара ширача заман маьждигаш ОКН юкъехьоргда
Тахан а дикка ховш дац, малагIча шерашка гIалгIай къамо бусалба дин хьаийцад. Деррига а тахка эттача, дIа-хьа кегалуш да. Бакъда 17-18-ча бIаьшерашка гIалгIай им дилла къам хиннилга тешал деш йола белгалонаш я.
Масала, хьалха хиннача маьждигий моттигашка тохкама болх дIахьош ваьллача лоамарча музея болхлочо теркалдечох, 18-ча бIаьшаре цига кхалха гIалгIай бусалба дино яххача тайпара дIабехка хиннилга ховш да.
Къаьнарча хана вай къаман наьха маьждигаш хинна моттигаш кораяьй Аьга-Кхале, Хамхи, Фалхан, Лялаха, Лакхерча Паьлинге, Лохерча Каьхке, Цхьоре, Гершке, Гаракхе, Кербе, иштта кхыдолча доазонашка.
«Царга хьожаш, бустамаш доахаш баьхкар болхлой. Цхьацца дола маьждигаш чIоагIа деха да, хIаьта цхьаццачар кIалхара лард йисай, меттаоттаде йиш йолаш. Вай дохадаь Казахстане Iодахьийтача хана, дохадаьд маьждигаш а ираз дайнараша. 1944-гIа шу тIаотталца лоаман юрташка баьхача вай къаман наха ламаз деш, рузба дIакхухьаш, Iийд лаьтта маьждигаш да уж. Могаш мел дола хIама даь уж маьждигаш меттаоттадар чIоагIа лоархIаме да вай къаман, хIана аьлча из вай сийрда, беркате истори да, вай даьша бусалба дин лорадеш хилара тешал», - белгалдир музее.
