ГӀишлошъяра балхех йолча РФ Министерствос дийцар, республике йоаржае лерхӀача проектех
РФ гӀишлой, ЖКХ балхех йолча министерствон кулгалхочун гӀонча волча Гордеев Юреца кхетаче хилар вай мехкарча цу оагӀонцарча министерствон хьалха латтача Иленаькъан Мусай. Из хоам тха газетага бир цу моттигера.
Кхетаче дийцар республике йоаржае лерхӀача кердача проектех. Вай мехкарча хьакима дийцар, паччахьалкхен, къаман проекташка гӀолла республике хьалъеш 30 гӀишло йолга, царна юкъера 26 йиллача хана йистеяьккхай, хӀаьта 4 гӀишло 2025-ча шера болх дӀабахьа безаш йолга. Иленаькъан Мусас белгалдечох, ерригача проектий болх 99,9%-га кхоачаш ба.
Къаьстта терко тӀайохийташ дийцар Шолж яхача хин юхе 2022-ча шера денз хьалъеш латтача хий цӀендеча моттигах. Вай мехкарча хьакима дийцачох, проектага гӀолла цига хьалъе лерхӀ аэротенк, массехк отстойникаш, кӀалха дижача кхоллара стабилизатор, реагентий склад, иштта кхыйола гӀишлош. «Карарча хана канализаце-насосни станце бетонацара балхаш йистедаьннад, цхьайола гӀишлош кийча я», - белгалдир Иленаькъан Мусас.
