Мехкарча РСМ оагӀонна кулгал деш, Яражанаькъан Адам хургва
27.09.2024 09:29
Мехкарча Россе кагирхой Союза оагӀонна кулгал деш, Яражанаькъан Адам хургва. Москве дӀайихьача Россе кагирхой Союза керттерча кхетаче хьаллаьцар, из цу моттига кулгалде хьожавар. Из хоам «Сердалога» бир кагирхой политикахи, туризмахи йолча Министерствос.
«Вахара, культуран оагӀонашцарча проекташта кагирхой тӀахьеха, кагирхошта лаьрхӀа кхетаченаш дӀакхахьа, ший болх бехктокхаме, боаггӀача боараме кхоачашбе говзал, хьинар долаш волга хьахайтад Адама. Из цу моттиге оттавара раьза хилар РСМ доакъашхой, кулгалхой», - дийцар тха газетага.
Мехка оагӀонцара кагирхой политика йоаржаяра тӀехьа къахьийгараш белгалбир цу кхетаче. Хьалха, РСМ юкъарлон болхло волаш, цо хьабенача наькъа лакха мах оттабеш, из лоархӀаш къамаьл дир кхетаче.
