Республика кийчо еш я бӀаьстан Ӏаьржача хишка
Дукхача хана денз, белгалъяьккхача бекарга бетта шоллагӀча даькъе хулача Ӏаьржа хиш доагӀача ханага кийчо еш я ГӀалгӀайче, цига чоалхане хьал оттаргдоацаш. Мехка хишца дувзаденна хьал халачарех да ала йиш еце а, Ӏаьдал кийчо еш да Эса, Шолж, Ӏарамхи долча доакъош тӀа нийсдала тарлуча кхоачамбоацарашка. Керттера да, лоаман хиш Ӏодоладелча, царна дика чакхдала моттиг цахилар.
ДукхагӀча даькъе цига зе хила тарлуш дараш да нах чубаха цӀенош, Илдарха-ГӀалий тӀа, Шолже, иштта Эбарга-Юрта, Тамариане наькъаш. Хила тарлуш дола хатар юхатохара лаьрххӀа бола болх кийчбаьб, хий чакхдалийтара йола моттигаш паргӀатъяхар, догӀаш хьаӀовш йола моттигаш цӀенъяр, дикагӀа хий чакхдаргдолаш. Гидрологически хьал миштад хара тӀахьожам лоаттабергба лаьрххӀача гӀирсашца.
Этта хьал сиха юхатохара республике эшаш дола материально- технически хьалаш хьакхеллад, цу юкъе я 579 техника, 8 хи тӀа лела гӀирс, 4 гӀетташ йола саг чу ца вагӀа аппараташ, 2816 болхло. Нагахьа санна нах меттагӀбаха безаш нийслой а аьнна, 720 фусам кийчъяьй, уж я Наьсаре, Илдарха-ГӀалий тӀа, Шолже, иштта Шолжа, ЖӀайрахьа кхаленашка.
«БӀаьсти хаоттам каст-каста хувцалуш ба, вай кийча хила деза моллагӀа долча хьалага. Хин йистошка хьажа деза, гидротехнически гӀишлой даькъ тӀара хьал довза деза, цига нийслуш дола чоалхане хьал сиха юстардаккхара»,-аьлар Келаматанаькъан Махьмуд-Ӏаьлас.
Мехка бахархошка хоам бергба, хила тарлуча хьалах, лаьрххӀача хоам беча автотранспортаца, сихача хьала болхоша, иштта SMS дӀаяхьийтарца. Телефон тоха еза укх номерех: «101», «102», «103», «104», «112».
