ГӀалгӀайчен росгвардейцаша вӀашагӀъехкар, шоаш доал деча ишколашка, Денала урокаш
ГӀалгӀай Республике гӀолла йолча Росгварде урхаллено доал деш йолча ишколашка, Чернобыльски атомни электростанце авари хинна 39 шу далара хетаяь Денала урокаш дӀайихьар, яхаш, дийцар «Сердало» газетага ГӀалгӀай Республике гӀолла йолча Росгварде зарбан болх лелабарах бехктокхаме секретарь йолча Сампенаькъан Салимас.
«Цу даькъ тӀарча викалаша берий теркам тӀаэзар, Россе исторен чу цу хана этта хинна из хьал лоархӀаме хилара. Берашта дийцар, цу хана авари хилар бахьан долаш, 31 саг валарах; цул совгӀа, 600 эзар саг, из чоалхане хьал дӀадоаккхаш къахьийгарех, радиаци хинна а висар. Керттера белгалдоаккхаш хиннар дар, денал гойташ, шоай могашал ехка, берригаш а цаӀ санна цига оттар», - аьлар хоамо.
«Цу тайпара кхетаченаш дешара моттигашка оаха ю каст-каста. Тхо хьож кхувш йоагӀача тӀехьен Даьхенцара безам совбаккха, шоай Даьхенца дувзаденна истори царна довзийта.
ЛоархӀаме да, вай тӀехьенна турпалхой цӀераш йовзаш хилар, шоай синош Ӏодаьхка, цар дунен тӀара чоалхане хьал юхатохар. Царна карагӀдаьннар массахана дӀаяздаь хургда мехка турпалча оагӀон тӀа»,-лоархӀ дувцача даькъ тӀарча урхаллен кулгалхочун гӀончас, подполковника Албетков Андрейс.
