Росгвардейцаш веннача Россе Турпалхочун дезал болча бахар
ГӀалгӀай Республикан Росгварде урхаллен викалаш, «Беркут-ЮГ» ОМОНаца болх баь боккхагӀбараш веннача Россе Турпалхочун Къоастой Або-Бакара дезал болча бахар. Из велар 2004 шера аьтинга бетта 21-22-ча деношка террористаш вай мехка чубаьнна хатар хиннача хана, яхаш, дийцар «Сердало» газетага ГӀалгӀай Республике гӀолла йолча Росгварде урхаллен зарбан болх лелабераша.
Шоаш цига бахача хана, моттигерча бокъонаш лораерий викалаша веннача министра вешийга Къоастой ХӀаронага дӀаелар 1-ра дозал дола Невский Александра орден. Бувцача болхлоел совгӀа, Або-Бакара дезал болча баха хилар «ЦаӀ йолча Россе» викалаш, доал деча даькъ тӀара кулгалхой.
Цунца болх беш хиннача Цхьорой Салмана яхачох: «Венна милице полковник ший мохк безаш, денал долаш саг вар. Дика новкъост вар из, моллагӀа унзара хьал оттарах, хьалхарчарца оттаргволаш вар», - аьлар къамаьл даьчо.
Белгалду, чурча гӀулакхий министра декхараш кхоачашдеш хиннача Къоастой Або-Бакарá зуламхоша го баь хиннаб. ДӀа-юха деттача герзах, цун валар хилар. Бакъда полковника денал хиларах, бокъонаш лораерий гӀишлонна тӀакхача вӀаштӀехьа даланзар цар.
