Росгварде дакъа лаьцар дагалоаттама, саготонна Ден юкъе
2004-ча шера аьтинга бетта 21 -22 деношка, ГӀалгӀайчен бӀаь вахархочун вахар хаьдар. Тахан ерригача республике бейнараш дагалаьца, сагатонна ди дӀахьош бар. Кхетаче дӀайихьар Наьсарен дагалоаттама, сийлен Мемориала доазон тӀа, цига дакъа лоацаш хилар мехка Кулгалхо Келаматанаькъан Махьмуд-Ӏаьла. Росгварде тӀема гӀулакх леладераш а хилар цига. ГӀалгӀай Республике гӀолла йолча Росгварде урхаллен кулгалхо, полице инарал-майор Буружанаькъан Микаил а цу кхетаче вена хилар. Цох дийцар цигара зарбан болх лелабеча Сампенаькъан Салимас.
«Из хатар хинна 20 шу даьнначул тӀехьагӀа, наха дагадоагӀа, бокъонаш лораеча дукхача болхлой вахар хаьда хинна из ди- бийса. Даим йоагача цӀера йисте зизаш даьхкар тӀема гӀулакх леладераша, цу бус боабаь хинна Даьхен сийдола къонгаш шоаш лоархӀаш хилар белгалдеш», - аьлар Сампенаькъан Салимас.
Шоай балха декхар кхоачашдеш бейнача бокъонаш лораеча болхлой сийна йолча аллее гулбеннараша, йист ца хулача минотаца, дагалаьцар уж.
