«Къилбаседа Кавказа Россетеша» ГӀалгӀайчен юрташка доал деча кулгалхошца кхетаче дӀахьу

Болхлой тоабан кхетаченаш дӀайихьай Наьсарен-Шахьара, Шолжа, Наьсарен, МагӀалбика кхалений кулгалхошца.

Энергетикаш вӀашагӀъеллача кхетачене дийцар, массаболча электроэнерги йоагаеча наха шоай ханнахьа цунах боагӀаш бола мах Ӏаьдала дӀачубала безарах, из ма хулла кӀезигагӀа йоагае хьажа безарах, хьатӀайоагӀача гуйран-Ӏан заманга кийчо е езарах.

«Вай цхьана айхха бувзам болаш дӀахьоча балхо йоагаеча сердалах ахча хьадалара гӀулакх аттача доаккхаргда. Цахадаш дӀахьош болча балха юкъе гуш да, вахаре лоархӀамеча урхалленашка таронаш тоалуш йоагӀаш хилар, наьха хьалаш тоадалар, инвестицеш юкъеяха таронаш хилар.

Уж хаттараш лакхача боарам тӀа латтаргдолаш, хӀаравар шийгара балха дакъа юкъедахьаш хила веза», — аьлар «Ингушэнерго» филиала кулгалхочун декхараш кхоачашдеш волча ТӀоаршхой Рамзана.

Энергетикаша ца дича даргдоацарех лаьрхӀар наха сердал йоагаярах дола декхар хьадаккхара болх кердабаккхар, вӀаштӀара даьча цӀеношка бахача наха йоагаеча лампаех дола ахча мелд тахкар; урамашка йоагаеш йола сердал мелий хар; керда цӀенош хьалдаьча моттигашка рейдаш дӀаяхьар, царца договораш чӀоагӀдар; нахаца хоам беш бола болх дӀабахьар.

«Из цхьаькха боаккхаш бола гӀа ба, нахагара декхараш хьагулдара, ГӀалгӀайчен доазон тӀа дебиторски декхараш лӀаьгӀдара.

ХӀанз чӀоагӀа лоархӀаме да, балхатӀа бехктокхаме хилар. Со тешаш ва «Къилбаседа Кавказа Россетеш» хьалъайдаь дешаш кхоачашде йиш йолаш да, регион дӀахо дегӀаяра ца хилча даргдоацарех а да, бакъда цу деша лаьрххӀа терко лоаттаеш хилча мара вӀаштӀехьадаргдац из», - аьлар «Къилбаседа Кавказа Россетий» керттерча кулгалхочун гӀончас БӀарахой Рашида.

Доал деча даькъ тӀарча кулгалхоша шоай аргӀагӀа энергетика балха юкъе айхха бувзам лелабара кийча ба шоаш, аьлар.

Энергокомпани дӀахо а республикан шахьарий, кхалаений балха тоабашца кхетаченаш дӀаяхьа лерхӀаш я.